പ്രിയപ്പെട്ട വള്ളിച്ചെടി...
ഞാനൊരു മഹാവൃക്ഷമല്ല.വൃക്ഷം എന്ന സംബോധന പോലും എനിക്ക് ചേരില്ല.എന്നെ അങ്ങനെ വിളിക്കുന്നത് എന്റെ കൂട്ടർക്ക് തന്നെ അപമാനമാണ്.മനുഷ്യരുടെ ഭാഷയിൽ പറഞ്ഞാൽ ' പാഴ്ത്തടി '.പക്ഷേ ഒന്നുണ്ട് കേട്ടോ, പാഴ്ത്തടിയായത് കൊണ്ടുമാത്രമാണ് എനിയ്ക്കിത്രയെങ്കിലും ആയുസ്സ് കിട്ടിയത് .അല്ലെങ്കിൽ പണ്ടേയ്ക്ക് പണ്ടേ എന്റെ കടയ്ക്കൽ കോടാലി വീണേനെ.
പ്രിയപ്പെട്ടവളെ, ഈ പറമ്പിന്റെ മൂലയിൽ നിന്നെ കൊണ്ടുവന്നിട്ട സൗന്ദര്യവിരോധിയാരാണെന്ന് ഞാനാലോചിക്കാറുണ്ട്.മനുഷ്യർക്ക് വളരെ വേണ്ടപ്പെട്ടവളാണല്ലോ നീ. എന്നിട്ടും ആർത്ത് വളരുന്ന കാട്ടുചെടികൾക്കൊപ്പം ആരാലും ഗൗനിക്കപ്പെടാതെ നീ നിൽക്കുന്നു.ആരും ഗൗനിക്കുന്നില്ലായെന്ന് പറഞ്ഞത് നിനക്കത്ര പിടിച്ചിട്ടില്ല എന്നറിയാം. മുഖം വാടണ്ട.ഞാനൊരു കള്ളം പറഞ്ഞതാണ്.ഈ പറമ്പിലെ തലപ്പൊക്ക വീരന്മാരും എന്നെപ്പോലെയുള്ള സാധുക്കളും നിന്നെ ഏറുകണ്ണിട്ട് നോക്കുന്നത് നീയറിയുന്നുണ്ടാവുമല്ലോ.
നിന്റെ വൃക്ഷശ്രേഷ്ഠൻ നൽകുന്ന തണൽത്തണുപ്പിന്റെ സ്വച്ഛതയിൽ നീ ചിരിക്കുന്നത് ഞാൻ കാണാറുണ്ട്.നിനക്ക് മാത്രം പടർന്നു കയറാൻ ചില്ലകളൊരുക്കിവച്ചു ഹതാശരായവരിൽ ഒരാളാണ് ഞാനും.നിന്റെ ഉയരക്കാരന്റെ മുൻപിൽ തലകുനിച്ചു നിൽക്കുവാൻ വിധിക്കപ്പെട്ടവരിൽ ഒരാൾ.ഒന്ന് തല ചരിച്ചു നോക്കിയാൽ എന്നെ കാണാം.
ഞാനിതുവരെ വാക്കുകൾ തിരയുകയായിരുന്നു, ഏറ്റവും ശ്രേഷ്ഠമായ കവിതയെഴുതാൻ ശ്രമിക്കുന്ന കവിയെ പോലെ.ഏറ്റവും മികച്ച കഥക്കൂട്ടൊരുക്കുന്ന കാഥികനെ പോലെ .പക്ഷേ നിന്നോട് സംസാരിക്കാൻ സ്വരുക്കൂട്ടിയ വാക്കുകൾ വെട്ടിയും തിരുത്തിയും മായ്ച്ചും മനസ്സ് ശൂന്യമായിക്കൊണ്ടിരുന്നു.ഒടുവിലിതാ , ഇങ്ങനെ, ഈ രൂപത്തിലത് പുറത്തു വന്നു.ഒരുപാട് വൈകി, ഒരുപാടൊരുപാട് വൈകിയെഴുതിയ പ്രേമലേഖനം.നിന്നോടുള്ള സ്നേഹം പറയാതെ ഒടുങ്ങാനെനിക്ക് മനസില്ല .ഈ തുറന്നു പറച്ചിലിന്റെ നിത്യമായ ആനന്ദമാണ് ഇഹത്തിലും പരത്തിലും എനിക്ക് മോക്ഷമേകാൻ പോകുന്ന പുണ്യനദി.
നീ കേൾക്കുന്നില്ലേ...!!!
എന്റെ ശരീരത്തിലേക്ക് പല്ലുകൾ ആഴ്ത്താൻ കൊതിച്ചു നിൽക്കുന്ന ഹിറ്റാച്ചിയുടെ യന്ത്രമുരൾച്ച നീ കേൾക്കുന്നില്ലേ...!!!
ഒടുവിൽ അവർ സമ്മതിക്കുന്നു, ഞാൻ ഒന്നിനും കൊള്ളാത്ത പാഴ്ത്തടിയല്ലായെന്ന് . തീപ്പെട്ടിക്കും തീക്കൊള്ളിക്കും ഈയുള്ളവൻ ബെസ്റ്റാണെന്ന്...
(ഒപ്പ് )
തീപ്പെട്ടി മരം
👏👏👏
ReplyDelete👌🏼❤️
ReplyDelete